Ferill 395. máls. Aðrar útgáfur af skjalinu: PDF - Word Perfect.
154. löggjafarþing 2023–2024.
Þingskjal 1139 — 395. mál.
Svar
háskóla-, iðnaðar- og nýsköpunarráðherra við fyrirspurn frá Elvu Dögg Sigurðardóttur um samfélagslega nýsköpun.
Fyrirspurnin hljóðar svo:
1. Eru einhver mælitæki nýtt til að mæla samfélagslega nýsköpun og framfarir í tengslum við hana á Íslandi?
2. Er hugtökin samfélagsleg nýsköpun og samfélagslegt frumkvöðlastarf að finna í markmiðasetningu ráðuneytisins eða nýsköpunarstefnu fyrir Ísland?
3. Hversu háa styrki hafa verkefni á sviði samfélagslegrar nýsköpunar hlotið undanfarin tíu ár? Hvert er hlutfall þeirra styrkja af heildarfjárhæð stuðnings til nýsköpunar?
Hjá stofnunum og sjóðum á vegum háskóla-, iðnaðar- og nýsköpunarráðuneytis er unnið að ýmsum aðgerðum á sviði samfélagslegrar nýsköpunar og framfara í tengslum við hana. Í því efni má einnig vísa til gildandi fjármálaáætlunar og stefnu ráðherra um Árangur fyrir Ísland, sbr. þingsályktun nr. 812/154. Almennt er stuðst við þau mælitæki sem felast í skilgreiningu aðgerða til að ná skilgreindum markmiðum í samræmi við stefnur málefnasviða og málaflokka í fjármálaáætlun og fjárlögum. Ráðuneytið undirbýr birtingu á framgangi skilgreindra aðgerða í þessu sambandi í svonefndu mælaborði á vef ráðuneytisins. Þá birtir forsætisráðuneyti reglulega framgang aðgerða í stjórnarsáttmála ríkisstjórnarinnar.
Í fjármálaáætlun er lýst mælikvörðum fyrir markmið á málefnasviði 07 Nýsköpun, rannsóknir og þekkingargreinar. Undir málaflokki 07.10 Samkeppnissjóðir og alþjóðlegt samstarf er m.a. lýst mælikvörðum vegna markmiðs um hagnýtingu hugvits og nýskapandi lausna á brýnum samfélagslegum áskorunum:
* Opinn aðgangur að niðurstöðum rannsókna aukist úr 75% í 85% árið 2028.
* Veittum einkaleyfum fjölgi úr 18 í 32 árið 2028.
* Veittum styrkjum til lausna við samfélagslegum áskorunum aukist úr 2 milljörðum kr. í 2,4 milljarða kr.
Eftirfarandi mælikvörðum er lýst fyrir málaflokk 7.20 Nýsköpun, hugvitsiðnaður og samkeppnishæfni vegna markmiðs um aukna hagnýtingu tæknilausna í þágu samfélagslegra áskorana:
* Að hagnýting tæknilausna í þágu samfélagsáskorana aukist úr Y í Z árið 2028.
* Að dragi úr losun GHL frá Íslandi úr 2730 í minna en 2500 árið 2028.
Í fjármálaáætlun er lýst mælikvörðum fyrir markmið á málefnasviði 21 Háskólastig. Undir málaflokki 21.1 Háskólar og rannsóknastarfsemi er m.a. lýst mælikvörðum vegna markmiðs um aukið samstarf háskóla í þágu gæða og samfélags:
* Fjölgun sameiginlegra námsleiða innlendra háskóla úr 8 í 20 árið 2028.
* Inntaka nemenda í háskólanám á grundvelli raunfærnimats aukist úr 34 í 120 árið 2028.
* Hlutfall brautskráðra nemenda í STEM-greinum og heilbrigðisvísindum aukist úr 18/16% í 22/20% árið 2028.
Af aðgerðum sem lýst er í stjórnarsáttmála ríkisstjórnarinnar sem falla undir samfélagslega nýsköpun má nefna eftirfarandi:
* Markáætlun um samfélagslegar áskoranir á sviði máltækni, umhverfismála- og sjálfbærni, tæknibreytinga á vinnumarkaði og heilbrigðisvísinda verður framhaldið allt kjörtímabilið.
* Efling rannsóknastarfs um land allt.
* Tryggt verði fjármagn til loftslagsverkefna og grænna lausna úr endurskilgreindum Nýsköpunarsjóði atvinnulífsins og Tækniþróunarsjóði.
* Haldið verður áfram að styðja við nýsköpun, m.a. með regluverki og umhverfi sem styður við stofnun og rekstur fyrirtækja, ekki síst í fámennari byggðum.
* Haldið verður áfram að styrkja uppbyggingu nýsköpunar á landsbyggðinni með Lóu – nýsköpunarstyrkjum.
Hugtökin samfélag og nýsköpun koma samtals um 135 sinnum fyrir í umfjöllun um málefnasvið 7 og 21 í fjármálaáætlun en þar standa þau þó hvergi saman. Hugtakið samfélag er í þingsályktun nr. 812/154 notað í tengslum við samfélagslegar áskoranir og þekkingarsamfélag.
Svör við fyrirspurninni miðast við þær upplýsingar sem háskóla-, iðnaðar- og nýsköpunarráðuneytið hefur aðgang að í skjalasafni þess frá því að það tók til starfa 1. febrúar 2022, sbr. forsetaúrskurð um skiptingu stjórnarmálefna milli ráðuneyta í Stjórnarráði Íslands, nr. 6/2022.
Sjóðir sem heyra undir ráðuneytið eru ekki flokkaðir eftir því hvort þeir veita styrki til samfélagslegrar nýsköpunar. Þó má færa rök fyrir því að samfélagsleg nýsköpun eigi við um styrki sem veitt er úr Fléttunni og Samstarfi háskóla, styrkveitingar úr Markáætlun á sviði vísinda og tækni um samfélagslegar áskoranir, styrki úr Tækniþróunarsjóði, styrki úr Nýsköpunarsjóði námsmanna. Hafa þarf þó í huga að flokkun styrkja er í mörgum tilvikum byggð á skilgreiningu umsækjenda styrks í styrkumsókn.
Fléttan.
Af hálfu ráðuneytisins hefur verið lögð áhersla á örvun nýsköpunar í heilbrigðiskerfinu með Fléttunni sem eru styrkir sem veittir eru til samstarfs nýsköpunarfyrirtækja og heilbrigðisstofnana fyrir vörur og þjónustu sem er til þess fallin að bæta þjónustu við sjúklinga, stytta biðlista og auka skilvirkni heilbrigðiskerfisins. Á árinu 2023 var 100 millj. kr. úthlutað úr Fléttunni. Styrkveitingin er háð því skilyrði að nýsköpunarfyrirtækin eigi í nánu samstarfi við stofnanir eða fyrirtæki í heilbrigðisþjónustu sem hefur skuldbundið sig til að innleiða þá nýsköpun sem styrkur er veittur til. Sérstök áhersla er lögð á stuðning við samstarf hins opinbera og einkaaðila um land allt.
Yfirlit yfir styrkveitingar úr Fléttunni 2022 og 2023.
| Umsækjandi | Lýsing | Samstarfsaðili | Styrkur í kr. |
| Fleygiferð ehf. | Innleiðing Leviosa á Heilbrigðisstofnun Suðurlands | Heilbrigðisstofnun Suðurlands | 11.000.000 |
| Mín líðan ehf. | Staðlaðar netmeðferðir við þunglyndi, kvíða, félagskvíða og lágu sjálfsmati inn á Heilsugæslur höfuðborgarsvæðisins | Heilsugæsla höfuðborgarsvæðisins | 7.000.000 |
| Gangverk ehf. – dala.care | Persónumiðuð umönnunaráætlun í heimaþjónustu ljósmæðra | Fæðingarheimili Reykjavíkur | 8.000.000 |
| Mobile Health | Hugræn atferlismeðferð við svefnleysi á heilsugæslu | Heilsugæslustöðvar | 8.000.000 |
| Sidekick Health | Stafrænn stuðningur við brjóstakrabbameini | LSH og Ljósið | 12.000.000 |
| Tiro ehf. | Diktering á íslensku í heilbrigðiskerfinu | Landspítali | 8.000.000 |
| Hrafnista, Hraunvangi | Smáforritið Iðunn | ORIGO | 11.000.000 |
| Kara Connect ehf. | Arðbær fjárfesting í velferð starfsmanna | Landspítali | 6.300.000 |
| DataLab Ísland | Hagnýting stafrænna gagna í starfsemi göngudeildar geðsviðs Landspítala | Landspítali | 11.500.000 |
| Medvit Health | Taugin – verkfæri við taugasálfræðimat á heilabilun og heilaskaða | Landspítali | 8.000.000 |
| Proency | Stafræn flokkun tilvísana og forgangsröðun í sálfræðiþjónustu Heilsugæslunnar á höfuðborgarsvæðinu: Eftirlit og rafrænn meðferðarstuðningur. | Geðheilsusvið Heilsugæslu höfuðborgarsvæðisins | 6.300.000 |
| Ljósið | Innleiðing WHODAS matstækis fyrir skilvirkari og markvissari meðferðaráætlanir | ORIGO | 7.000.000 |
| Skræða ehf. | Stafrænar fyrirlagnir mælitækja og matslista til greiningar og meðferðarmats á geð-, þroska- og hegðunarröskunum | Heilsugæsla höfuðborgarsvæðisins | 9.000.000 |
| Sidekick Health | Fjarvöktun og fjarstuðningur við sjúklinga á hjartadeild Landspítala. | Landspítali | 9.000.000 |
| Einurð | Innleiðing IPS jafningjaþjálfunar á Íslandi. Stuðningur – Þjálfun – Nýsköpun. | Landspítali, Hlutverkasetur, Íslenski ferðaklasinn, Lifekeys, IPS International | 6.000.000 |
| Nordverse Medical Solutions | Prescriby – Innleiðing öruggari meðferða ávanabindandi lyfja | Þjónustumiðstöð íslenskrar heilsugæslu, Heilsugæsla höfuðborgarsvæðisins, Nordverse Medical Solutions | 4.000.000 |
| Fleygiferð ehf. | Innleiðing Leviosa á Reykjalundi | Reykjalundur | 9.000.000 |
| Kara Connect ehf. | Velferðartorg starfsmanna Landspítala | Landspítali | 9.000.000 |
| SVAI ehf. | Fækkun spítalasýkinga er verða með beinu snertismiti leyst með hátækni og gervigreindarhugbúnaði. | Landspítali, Sjúkrahúsið á Akureyri | 9.000.000 |
| Dicino Medical Technologies | Fjöltyngt forskráningarkerfi: Hugbúnaður sem er fjöltyngt forskráningarkerfi sjúklinga við komu til læknis/heilsugæslu. Ný þjónusta við sjúklinga sem getur stytt biðtíma, létt á starfsfólki og fækkað mistökum. |
Heilsugæslan, Landlæknir, Dicino Medical Technologies | 5.000.000 |
| Samtals | 164.100.000 |
Samstarf háskóla.
Frá hausti 2022 hefur í tvígang verið úthlutað styrkjum til háskóla og starfsaðila þeirra undir heitinu Samstarf háskóla sem miðar að því að auka gæði háskólanáms og samkeppnishæfni háskólanna. Ráðherra úthlutaði nýlega styrkjum í Samstarfi háskóla til 35 verkefna styrk samanlagt fyrir tæplega 1,6 milljarða kr. Við styrkveitingu voru sex megináherslur að þessu sinni og bárust umsóknir í eftirtöldum flokkum.
Sameining háskóla – fimm umsóknir.
Stjórnsýsla, stoðþjónusta og nýting innviða til að auka gæði, hagkvæmni og skilvirkni – 14 umsóknir.
Lausnir við samfélagslegum áskorunum svo sem loftslagsmál, heilbrigðisþjónusta og gervigreind – 10 umsóknir.
Nýsköpun í háskólastarfi, svo sem með nútímalegri kennsluháttum, þverfaglegu námi og fjarnámi – 15 umsóknir.
Alþjóðleg sókn íslenskra háskóla og alþjóðavæðing – sex umsóknir.
Iðkun á þriðja hlutverki háskóla svo sem með áherslu á lýðræðislega umræðu – fimm umsóknir.
Yfirlit yfir styrkveitingar úr samstarfi háskóla 2023 og 2024.
| Heiti verkefnis | Lykilorð | Upphæð í kr. |
| Sameinaður háskóli, Háskólans á Akureyri (HA) og Háskólans á Bifröst (HB) | Sameining háskóla | 200.000.000 |
| Rannsóknasjóður sameinaðs háskóla HA og HB | Sameining háskóla | 250.000.000 |
| Háskólasamstæða Háskóla Íslands (HÍ) og Háskólans á Hólum (HH) | Sameining háskóla | 200.000.000 |
| Vettvangsakademía á Hofstöðum í Mývatnssveit | Sameining háskóla | 31.900.000 |
| Ferðamálanám til framtíðar | Sameining háskóla | 30.000.000 |
| Þverfaglegt nám í sjálfbærri byggðafræði | Sameining háskóla | 29.250.000 |
| Nemendum auðveldað að stunda meistaranám við fleiri en einn háskóla | Stjórnsýsla, stoðþjónusta og nýting innviða | 36.765.000 |
| Þrívíddarprentun og sýndarveruleiki notaður til að bæta heilbrigðisþjónustu og auka öryggi sjúklinga | Stjórnsýsla, stoðþjónusta og nýting innviða | 31.104.333 |
| Efling samstarfs um nám í GIS og fjarkönnun | Stjórnsýsla, stoðþjónusta og nýting innviða | 31.104.333 |
| EduChain nýtt til að sannreyna alþjóðleg prófskírteini og auðvelda fólki með erlendar prófgráður þátttöku í íslensku samfélagi | Stjórnsýsla, stoðþjónusta og nýting innviða | 28.800.000 |
| Miðstöð stafrænna hugvísinda og lista | Stjórnsýsla, stoðþjónusta og nýting innviða | 25.600.000 |
| GAGNÍS – fræðsla, aukin þjónusta og umfang | Stjórnsýsla, stoðþjónusta og nýting innviða | 23.800.000 |
| Rammasamningur HÍ og HR | Stjórnsýsla, stoðþjónusta og nýting innviða | 19.800.000 |
| SamLeið: Sameiginleg leiðbeinendaþjálfun á Íslandi | Stjórnsýsla, stoðþjónusta og nýting innviða | 10.000.000 |
| Rafræn miðlun fræðandi efnis um jafnréttismál | Stjórnsýsla, stoðþjónusta og nýting innviða | 3.800.000 |
| Nám í ráðgjöf í málefnum fólks með heilabilun | Lausnir við samfélagslegum áskorunum | 69.062.000 |
| Sérfræðinám í klínískri taugasálfræði | Lausnir við samfélagslegum áskorunum | 40.200.000 |
| Fagmál hjúkrunar (ICNP) til kennslu og rannsókna | Lausnir við samfélagslegum áskorunum | 40.000.000 |
| Nýjar lausnir fyrir heilbrigðiskerfið | Lausnir við samfélagslegum áskorunum | 35.100.000 |
| Þróun kennslu, náms og val á nemendum í hjúkrun | Lausnir við samfélagslegum áskorunum | 31.034.194 |
| Klínísk málsýnagreining | Lausnir við samfélagslegum áskorunum | 22.600.000 |
| Efling klínískrar lyfjafræði á Akureyri | Lausnir við samfélagslegum áskorunum | 17.780.000 |
| Efling tæknináms á Norðurlandi: Tæknifræði Háskólans í Reykjavík í Háskólanum á Akureyri | Nýsköpun í háskólastarfi | 57.490.000 |
| Forskot Íslands í tölvusönnun | Nýsköpun í háskólastarfi | 51.840.000 |
| Innleiðing á raunfærnimati til styttingar náms | Nýsköpun í háskólastarfi | 40.000.000 |
| Rannsóknanám í listum og listfræði | Nýsköpun í háskólastarfi | 37.000.000 |
| Örnám í framleiðslu í skapandi greinum | Nýsköpun í háskólastarfi | 24.035.000 |
| Sjálfbær landbúnaður og byggðaþróun: Meistaranám | Nýsköpun í háskólastarfi | 18.000.000 |
| Snjallræði | Nýsköpun í háskólastarfi | 15.000.000 |
| Fjölmiðla- og boðskiptanám á tímum upplýsingaóreiðu | Nýsköpun í háskólastarfi | 10.859.000 |
| Financial Economics Group – Iceland (FEGI) | Nýsköpun í háskólastarfi | 6.650.000 |
| Sókn og nýsköpun háskóla í evrópskum háskólanetum | Alþjóðleg sókn íslenskra háskóla og alþjóðavæðing | 7.200.000 |
| Forritunarkeppni háskólanna á Íslandi (FKHÍ) – ICPC | Alþjóðleg sókn íslenskra háskóla og alþjóðavæðing | 4.800.000 |
| Að innleiða bestu starfsvenjur í tengslum við taugafjölbreytileika (Establishing Neurodiversity Best Practices) | Iðkun á þriðja hlutverki háskóla | 48.666.150 |
| Inngilding í íslensku háskólasamfélagi | Iðkun á þriðja hlutverki háskóla | 48.250.000 |
| Inngildandi nám á háskólastigi | Iðkun á þriðja hlutverki háskóla | 15.000.000 |
| Fjölgun nemenda í heilbrigðisvísindum með nýjum færnibúðum | Fjölgun nemenda í heilbrigðisvísindum | 165.000.000 |
| Ugla þróuð til að bæta þjónustu við háskólanema | Stjórnsýsla og stoðþjónusta | 102.000.000 |
| Sameiginlegt átak í íslensku, m.a. með fjarnámi | Efling íslenskra háskóla á alþjóðlegum vettvangi, efling íslensku og máltækni, aukin gæði háskólanáms | 100.000.000 |
| Nýtt meistaranám í netöryggi | Nám óháð staðsetningu, fjölgun erlendra nema, STEAM-greinar, aukin gæði háskólanáms | 90.000.000 |
| Ný námsbraut fyrir kvikmynda- og tölvuleikjagerð | Efling íslenskra háskóla á alþjóðlegum vettvangi, nýting rannsóknarinnviða, sjálfbærni, nám óháð staðsetningu, fjölgun erlendra nemenda, STEAM, aukin gæði háskólanáms | 64.000.000 |
| Þverfaglegt meistaranám í heilbrigðislausnum og í svefni | Efling íslenskra háskóla á alþjóðlegum vettvangi, nýting rannsóknarinnviða, sjálfbærni, nám óháð staðsetningu, fjölgun erlendra nemenda, STEAM, aukin gæði háskólanáms | 64.000.000 |
| Öflugt háskólanám í þágu fiskeldis | Efling íslenskra háskóla á alþjóðlegum vettvangi, nýting rannsóknarinnviða, sjálfbærni, nám óháð staðsetningu, STEAM-greinar, aukin gæði háskólanáms | 58.000.000 |
| Samstarf um nýtingu rannsóknarinnviða á Íslandi | Efling íslenskra háskóla á alþjóðlegum vettvangi, nýting rannsóknarinnviða | 54.000.000 |
| Undirbúningsnámsleið fyrir innflytjendur og flóttamenn á Íslandi | Fjölgun erlendra nemenda, aukin gæði háskólanáms | 53.000.000 |
| Fagmenntuðu leikskólastarfsfólki fjölgað og fjarnám eflt | Nám óháð staðsetningu, fjölgun nemenda í menntavísindum | 48.000.000 |
| Aukin starfsþróun háskólakennara til að auka gæði kennslu í stafrænu samfélagi | Aukin gæði háskólanáms | 46.000.000 |
| Nemendur geti tekið námskeið í meistaranámi við marga skóla samtímis | Nám óháð staðsetningu, samstarf við atvinnulíf, þverþjóðlegt samstarf | 35.000.000 |
| Öflugra tækninám á Norðurlandi | 33.000.000 | |
| Ísland verði í forystu í framleiðslu nýrra próteina | Efling íslenskra háskóla á alþjóðlegum vettvangi, nýting rannsóknarinnviða, sjálfbærni | 32.000.000 |
| Nemendum í vísindum, tækni, verkfræði og stærðfræði fjölgað | STEAM-greinar | 30.000.000 |
| Gagnaþjónusta félagsvísinda efld | Nýting rannsóknarinnviða | 30.000.000 |
| Samþætting og þróun IRIS (upplýsingagátt rannsókna) | Efling íslenskra háskóla á alþjóðlegum vettvangi, nýting rannsóknarinnviða, sjálfbærni | 28.000.000 |
| STEAM í Sögu | STEAM-greinar | 28.000.000 |
| Akademía íslenska hestsins | Fjölgun erlendra nemenda, aukin gæði háskólanáms | 22.000.000 |
| Efling náms og rannsókna á sviði menningar og skapandi greina | Sjálfbærni, efling íslensku og máltækni, nám óháð staðsetningu | 21.000.000 |
| Þverfaglegt nám í skipulagsfræði | Sjálfbærni, nám óháð staðsetningu, STEAM-greinar | 21.000.000 |
| Sameiginlegt meistaranám í heilsugæsluhjúkrun | Nám óháð staðsetningu, fjölgun nemenda í heilbrigðisvísindum, aukin gæði háskólanáms | 9.000.000 |
| Íþróttasálfræði á meistarastigi | Nám óháð staðsetningu, fjölgun nemenda í menntavísindum | 8.000.000 |
| Kennslufræði raungreina | Nám óháð staðsetningu | 4.000.000 |
| Samtals | 2.737.490.010 |
a. Markáætlun á sviði vísinda og tækni um samfélagslegar áskoranir styrkir verkefni í þremur flokkum verkefna: umhverfismál og sjálfbærni; heilsa og velferð; og líf og störf í heimi breytinga. Einungis hefur verið veitt einu sinni úr markáætlun um samfélagslegar áskoranir árið 2020, en þá var rúmum 669 millj. kr. veitt til verkefna.
Að neðan má sjá yfirlit yfir þau verkefni sem þá voru styrkt.
| Heiti verkefnis | Lykilorð | Upphæð í kr. |
| Sjálfbært heilsusamlegt mataræði: Vísindi sem vegvísir í átt að sjálfbærri framtíð | Sjálfbærni, matvælaframleiðsla, kolefnisspor, næring, lífsferilsgreining, fæðuöryggi | 80.133.000 |
| Leit að lífmerkjum í heilamyndum fyrir snemmbúna greiningu á Parkinson plús sjúkdómum | Segulómun, heili, myndflokkun, lífmerki, parkinson plús, heilabilun, djúp tauganet | 40.000.000 |
| Lóan: Dregið úr áleitnum endurminningum eftir áföll með hugrænu inngripi | Áföll, stutt inngrip, áfallastreituröskun, áleitnar minningar, geðheilbrigði, meðferð, aðgengi að meðferð | 70.460.000 |
| Endurheimt birkivistkerfa á 21. öld – áskoranir, leiðir og ávinningur | Líffræðileg fjölbreytni, kolefnisbinding, stjórnarhættir, landslag, vistvænar lausnir, haghafar, fagurferði | 112.141.000 |
| Bætt þjónusta við sjúklinga með hjarta- og æðasjúkdóma með stafrænni nálgun | Stafrænar lausnir, smáforrit, hjartasjúkdómar, lífstílsmeðferð, fjarvöktun, meðferð | 173.141.000 |
| Sjálfbær staðbundin nýting hráefna í áburð – heildstæð nálgun að hringrásarhagkerfi | Hringrásarhagkerfi, áburður, lífrænt, sjálfbært, food security | 162.405.000 |
| Að rækta vistkerfi nýsköpunar í dreifðum byggðum | Vistkerfi nýsköpunar, byggðaþróun, nýsköpun, landsbyggðir | 30.898.000 |
| Samtals | 669.178.000 |
b. Tækniþróunarsjóður styður þróunarstarf og rannsóknir sem miða að nýsköpun í íslensku atvinnulífi. Rannís hefur safnað gögnum um tengsl verkefna við Heimsmarkmið SÞ undanfarna þrjá umsóknarfresti. Umsækjendur hafa því hakað við allt að tvö heimsmarkmið í sínum umsóknum. Hér að neðan er yfirlit yfir styrkveitingar eftir einstökum heimsmarkmiðum. Þó er settur sá fyrirvari að þar sem umsækjendur geta hakað við allt að tvö heimsmarkmið þá er fjármagn tvítalið hér að neðan.
Styrkveitingar eftir markmiði sem umsækjandi velur #1:
| Heimsmarkmið | Upphæð í kr. |
| 1. Engin fátækt | 20.000.000 |
| 2. Ekkert hungur | 33.730.000 |
| 3. Heilsa og vellíðan | 412.993.000 |
| 4. Menntun fyrir alla | 120.000.000 |
| 5. Jafnrétti kynjanna | 112.962.000 |
| 7. Sjálfbær orka | 188.270.000 |
| 8. Góð atvinna og hagvöxtur | 215.000.000 |
| 9. Nýsköpun og uppbygging | 383.127.000 |
| 10. Aukinn jöfnuður | 90.000.000 |
| 11. Sjálfbærar borgir og samfélög | 35.000.000 |
| 12. Ábyrg neysla og framleiðsla | 260.496.000 |
| 13. Aðgerðir í loftslagsmálum | 213.977.000 |
| 14. Líf í vatni | 30.000.000 |
| 16. Friður og réttlæti | 50.000.000 |
| 17. Samvinna um markmiðin | 50.000.000 |
| Samtals | 2.215.555.000 |
Styrkveitingar eftir markmiði sem umsækjandi velur #2:
| Heimsmarkmið | Upphæð í kr. |
| 2. Ekkert hungur | 20.000.000 |
| 3. Heilsa og vellíðan | 39.996.000 |
| 4. Menntun fyrir alla | 50.000.000 |
| 5. Jafnrétti kynjanna | 58.050.000 |
| 6. Hreint vatn og hreinlætisaðstaða | 20.000.000 |
| 7. Sjálfbær orka | 60.000.000 |
| 8. Góð atvinna og hagvöxtur | 234.663.000 |
| 9. Nýsköpun og uppbygging | 761.405.000 |
| 10. Aukinn jöfnuður | 70.000.000 |
| 11. Sjálfbærar borgir og samfélög | 58.980.000 |
| 12. Ábyrg neysla og framleiðsla | 264.601.000 |
| 13. Aðgerðir í loftslagsmálum | 266.892.000 |
| 14. Líf í vatni | 55.000.000 |
| 15. Líf á landi | 24.000.000 |
| 16. Friður og réttlæti | 10.000.000 |
| Ekkert valið | 221.968.000 |
| Samtals | 2.215.555.000 |
c. Nýsköpunarsjóður námsmanna veitir styrki til háskólanema í grunn- og meistaranámi og markmið sjóðsins er að gefa háskólum, rannsóknastofnunum og fyrirtækjum tækifæri til að ráða námsmenn í grunnnámi og námi á meistarastigi við háskóla til sumarvinnu að rannsóknar- og þróunarverkefnum. Á árunum 2014–2023 hefur sjóðurinn veitt 1.871 millj. kr. til launa stúdenta sem vinna í sumarvinnu að rannsóknar- og þróunarverkefnum.
Málefni nýsköpunar voru áður vistuð í nýsköpunar- og iðnaðarráðuneyti. Háskóla-, iðnaðar- og nýsköpunarráðuneyti var stofnað 1. febrúar 2022. Upplýsingar liggja ekki fyrir í ráðuneytinu um flokkun styrkveitinga í fyrra ráðuneyti með tilliti til samfélagslegrar nýsköpunar. Af samanlögðum fjárheimildum í málaflokki 07.20 Nýsköpun, rannsóknir og þekkingargreinar samkvæmt fjárlögum 2022 og 2023 er hlutdeild háskóla-, iðnaðar- og nýsköpunarráðuneytis 20,8 milljarðar kr. Á sama tímabili hefur Tækniþróunarsjóður úthlutað styrkjum fyrir 3,7 milljarða kr. sem skiptast m.a. í fyrrgreinda flokka samfélagslegrar nýsköpunar, sem samanlagt nema 2,2 milljörðum kr.
