afstaða stjórnarþingmanna til ESB.
Virðulegi forseti. Út af ummælum hv. þingmanns ætla ég að rifja upp að þegar samþykkt var að leggja inn umsókn um aðild að Evrópusambandinu fóru menn vitaskuld í atkvæðagreiðslu. Tillagan var samþykkt með 33 atkvæðum gegn 28 þannig að hún hafði drjúgan meiri hluta eins og mörg önnur mál sem spáð er hér áður en þau koma í atkvæðagreiðslu að nái ekki fram að ganga.
Það er alveg rétt sem hv. þingmaður rifjar hér upp, einhverjir þingmenn Vinstri grænna voru á móti þessu ákvæði stjórnarsáttmálans. Ég veit þó ekki betur en að stjórnarsáttmálinn hafi farið í gegnum flokksráð Vinstri grænna og verið samþykktur þar eins og hann var samþykktur í flokksstjórn Samfylkingarinnar. Það er ekkert meira um það að segja. Þó að einstaka þingmenn Vinstri grænna hafi verið á móti málinu hafði þetta drjúgan meiri hluta í þinginu og var samþykkt í flokksstofnunum beggja flokkanna. Það er lykilatriði í málinu.
Varðandi samþykkt Alþingis var ítarleg greinargerð lögð fram með þessari þingsályktunartillögu, m.a. um einstaka kafla og einstaka þætti á þessari vegferð. Ég veit ekki betur en að það hafi í einu og öllu verið leiðarljós þeirra sem hafa staðið í þessum samningum að fylgja leiðsögninni í þeirri þingsályktunartillögu. Ég held að það sé ekkert yfir því að kvarta.
Þegar spurt er hvort hver þingmaður geti talað eins og hann vill í þessu máli verð ég að segja að ég veit ekki til þess að málfrelsið hafi verið tekið af hv. þingmanni eða öðrum í málinu. Niðurstaðan var alveg klár í stjórnarsáttmálanum, það átti að ljúka viðræðum og bera samninginn undir þjóðina í þjóðaratkvæðagreiðslu. (Gripið fram í.)
