Samantekt um þingmál
378. mál á 151. löggjafarþingi.
Samgöngu- og sveitarstjórnarráðherra.
Markmið
Að auka sjálfstjórn og sjálfbærni sveitarfélaga og efla sveitarstjórnarstigið í heild.
Helstu breytingar og nýjungar
Lagt er til að kveðið verði á um að lágmarksíbúafjöldi sveitarfélaga verði eitt þúsund og í frumvarpinu er mælt fyrir um aðlögun að slíku lágmarki og hvernig málsmeðferð skuli háttað þegar ráðherra hefur frumkvæði að sameiningu sveitarfélaga. Önnur ákvæði frumvarpsins tengjast sameiningu sveitarfélaga, s.s. ákvæði sem skýrir og eykur heimildir sveitarfélaga til að nýta fjarfundabúnað á fundum sínum. Einnig er lagt til að sveitarfélög þurfi að móta stefnu um þjónustustig byggða sem eru fjarri stærri byggðakjörnum. Að auki eru lagðar til ýmsar aðrar breytingar sem miða að því að draga úr lagahindrunum við sameiningu sveitarfélaga.
Breytingar á lögum og tengd mál
Sveitarstjórnarlög, nr.
138/2011.
Lög um tekjustofna sveitarfélaga, nr.
4/1995.
Kostnaður og tekjur
Gert er ráð fyrir óverulegum áhrifum á ríkissjóð.
Afgreiðsla
Samþykkt með allnokkrum breytingum. Fellt var brott ákvæði þar sem kveðið var á um að ráðherra skyldi eiga frumkvæði að sameiningum sveitarfélaga í þeim tilvikum þar sem sveitarfélag næði ekki lágmarksstærð. Samþykkt var að kveða á um að sveitarstjórn sveitarfélags sem ekki nær lágmarksstærð beri að leitast við að ná markmiðum um aukna sjálfbærni sveitarfélaga og tryggja getu þess til að annast lögbundin verkefni. Til þess að ná þeim markmiðum geti sveitarstjórn annaðhvort hafið formlegar sameiningarviðræður á grundvelli 119. gr. sveitarstjórnarlaga eða látið vinna álit um stöðu sveitarfélagsins og sameiningarkosti þess. Í stað ákvæðis um að lágmarksíbúafjöldi sveitarfélags skyldi vera eitt þúsund íbúar var samþykkt ákvæði um þá almennu stefnumörkun að stefna skuli að því að lágmarksstærð sveitarfélags verði eitt þúsund íbúar.
Síðast breytt 24.06.2021. Tenglar í efni sem ekki er á vef Alþingis geta breyst og eru birtir án ábyrgðar. Unnið af starfsfólki upplýsinga- og rannsóknaþjónustu Alþingis.
Um samantektir
Samantektir um þingmál hafa verið birtar á vef Alþingis síðan á 141. þingi (2012-2013). Markmiðið er að setja fram í stuttu máli greinargóðar upplýsingar um þingmál og að tengja í efni sem gæti skýrt það frekar.
Samantektir eru einkum unnar um stjórnarfrumvörp en upplýsingum um önnur mál er bætt við eftir þörfum. Fylgst er með máli frá því að það kemur fram á þinginu og upplýsingum bætt við eftir því sem fram vindur. Þær eru að mestu fengnar úr texta frumvarps og umsagna, en tengt er í efni á öðrum vefjum eftir því sem tilefni er til. Tenglar í efni sem ekki er á vef Alþingis geta breyst og eru birtir án ábyrgðar. Umfjöllunin á að vera óhlutdræg en ekki er hægt að gera ráð fyrir að hún sé tæmandi. Samantektin er ekki hluti af þinglegri meðferð né formlegum skjölum þingmálsins.
Allar ábendingar og athugasemdir eru vel þegnar og má senda þær á netfangið rannsoknathjonusta@althingi.is.
